Imkoniyatlar

O‘zbekistonda yoshlar turizmini rivojlantirish, viloyat va shaharlarning turistik salohiyatini keng targ‘ib qilishga qaratilgan videoroliklar tanlovi eʼlon qilinmoqda!


21-Sentabr, 2022-yil 12:39 403

O‘zbekistonda yoshlar turizmini rivojlantirish, tuman va shaharlarning turistik salohiyatini keng targ‘ib qilishga qaratilgan videoroliklar tanlovini o‘tkazish to‘g‘risida

NIZOM


1-bob. Umumiy qoidalar

1. Ushbu Nizom O‘zbekistonda yoshlar turizmini rivojlantirish, tuman va shaharlarning turistik salohiyatini keng targ‘ib qilishga qaratilgan videoroliklar tanlovini tashkil etish uchun O‘zbekiston Respublikasi Turizm va madaniy meros vazirligi (keyingi o‘rinlarda - Vazirlik) tomonidan tanlov o‘tkazish tartibini belgilaydi.

2. Ushbu Nizomda quyidagi tushunchalar qo‘llaniladi:

Tanlov - O‘zbekistonda yoshlar turizmini rivojlantirish, tuman va shaharlarning turistik salohiyatini keng targ‘ib qilishga qaratilgan videoroliklar tanlovi; 

Tanlov tashkilotchisi – Vazirlik hamda quyidagi vazirlik va idoralardan iborat tashkiliy qo‘mita: Madaniyat vazirligi, Ekologiya va atrof muhitni muhofaza qilish davlat qo‘mitasi, O‘zbekiston Milliy teleradiokompaniyasi, O‘zbekiston milliy axborot agentligi, Fanlar akademiyasi, va Maʼnaviyat va maʼrifat markazi, O‘zbekiston Respublikasi Yoshlar ishlari agentligi; 

Tanlov hayʼati -quyidagi vazirlik va idoralardan tashkil topadi: Vazirlik, Madaniyat vazirligi, Ekologiya va atrof muhitni muhofaza qilish davlat qo‘mitasi, O‘zbekiston Milliy teleradiokompaniyasi, O‘zbekiston milliy axborot agentligi, Fanlar akademiyasi, va Maʼnaviyat va maʼrifat markazi, O‘zbekiston Respublikasi Yoshlar ishlari agentligi;

3. Tanlov tashkilotchisi Tanlov shartlari va qoidalarini belgilaydi.

4. Ishtirokchilar tanlovda individual tarzda yoki jamoa sifatida qatnashishlari mumkin.

5. Tanlov boshlanishi haqidagi e’lon, kelishilgan holda, yagona shaklda, 4 tilda (o‘zbek, qoraqalpoq, rus, ingliz) Tanlov tashkilotchilarining axborot resurslarida (www.motach.uz, www.uzbekistan.travel, www.yoshlar.gov.uz, www.madaniyat.uz, www.mtrk.uz, www.uza.uz, www.academy.uz, www.manaviyat.uz, www.eco.gov.uz, va ularga tegishli ijtimoiy tarmoqlarida) e’lon qilinadi. 

6. Tanlov tashkilotchisi Tanlovni tayyorlash va o‘tkazish bilan bog‘liq barcha masalalar bo‘yicha o‘zgartirish va qo‘shimchalar kiritish huquqini o‘zida saqlab qoladi.


7. Tanlov natijalari Tanlov tashkilotchilari sahifalarida e’lon qilinadi (www.motach.uz, www.uzbekistan.travel, www.yoshlar.gov.uz, www.madaniyat.uz, www.mtrk.uz, www.uza.uz, www.academy.uz, www.manaviyat.uz, www.eco.gov.uz)


2-bob. Tanlovning asosiy maqsad va vazifalari


8.Tanlovning maqsadi:

O‘zbekistonning turizm salohiyatini, madaniy merosini o‘rganish va uni targ‘ib qilish, jamoatchilik, xususan, yoshlar orasida keng targ‘ib qilish hisoblanadi.

9. Tanlovning vazifalari:

- O‘zbekistonning turizm salohiyatini aks ettiruvchi videoroliklarni ijtimoiy tarmoqlar orqali keng targ‘ib qilish;

- tanlovda faol qatnashgan yoshlarni munosib rag‘batlantirish.


3-bob. Tanlov o‘tkazish tartibi va kalendar rejasi

10. Tanlov 2022-yil 15-sentabrdan 15-oktabrga qadar o‘tkaziladi.

11. Tanlov ishtirokchilari tomonidan barcha shartlar bajarilganligini baholash bo‘yicha tanlov Tashkiliy qo‘mita tomonidan shakllantiriladi va uning ro‘yxati Tashkiliy qo‘mita raisi tomonidan tasdiqlanadi.

12. Tanlov kalendar rejasi quyidagilardan iborat:

- tanlov haqidagi e’lonni tayyorlash hamda OAVlari, ijtimoiy tarmoqlarda keng ko‘lamda yoritish – 2022-yil 15-sentabrgacha;

- tanlov tashkilotchisi tomonidan g‘olib va sovrindorlarni aniqlash va taqdirlash marosimini o‘tkazish – 2022-yil 2-dekabr; 

- tanlov yakunlari haqidagi ma’lumotlarni tayyorlash hamda OAVlari, ijtimoiy tarmoqlarda e’lon qilish – 2022-yil 2-dekabrgacha.


4-bob. Tanlov qatnashchilari va undagi materiallarga qo‘yiladigan talablar, g‘oliblarni aniqlash mezonlari – monitoring qilish tartibi

13. Tanlov quyidagi bosqichlarda o‘tkaziladi:

1-bosqich: Tanlov e’lon qilinganligi haqida Tanlov tashkilotchilari axborot resurslarida (www.motach.uz, www.uzbekistan.travel, www.yoshlar.gov.uz, www.madaniyat.uz., www.mtrk.uz, www.uza.uz, www.academy.uz, www.manaviyat.uz, www.eco.gov.uz, va ularga tegishli ijtimoiy tarmoqlarida) e’lon qilinadi;


Tanlov e’lon qilinganligi haqida Vazirlikning rasmiy sayti, Uzbekistan.travel veb portali va ijtimoiy tarmoqlardagi sahifalari orqali xabar beriladi;


2-bosqich: 30 (o‘ttiz) kun davomida tashkil etiladigan Tanlov doirasida ishtirokchilar, o‘zlarining ijtimoiy tarmoqlardagi sahifalarida #yoshlartravel, #uzbtravel #uzbekistantravel #TITF_2022 heshteglari bilan e’lon qilingan video materiallar tanlov tashkilotchilari tomonidan monitoring qilinadi; 

14. G‘oliblar ijtimoiy tarmoqlarda (Facebook, Instagram, TikTok) joylashtirilgan video materiallarga to‘plangan “like”lar soni bo‘yicha aniqlanadi. 

15. Tanlovning barcha tashkiliy jarayonlari tanlov tashkilotchisi hamda Turizm va madaniy meros vazirligi huzuridagi “Milliy PR-markazi” DUK (keyingi o‘rinlarida -Markaz) tomonidan amalga oshiriladi.


5-bob. Tanlov ishtirok etish tartibi va shartlari

16. Tanlovda ishtirok etish uchun, ishtirokchilar videoroliklarni o‘zlarining ijtimoiy tarmoqlardagi (Facebook, TikTok va Instagram) sahifalariga #yoshlartravel, #uzbtravel  #uzbekistantravel #TITF_2022 heshteglari bilan joylashtirishi lozim;

17. Ishtirokchilar ijtimoiy tarmoqdagi o‘zlari videoroliklar joylashtirgan Vazirlik va Markaz sahifalariga (www.motach.uz, www.uzbekistan.travel, Instagram - @uzb_travel, Facebook – Uzbekistan Travel va h.k.z) obuna bo‘lishlari lozim. 

18. Tanlov ishtirokchilarining ijtimoiy tarmoqdagi akkauntlari Tanlov davomida ochiq holda bo‘lishi lozim.

19. Internet tarmog‘ida e’lon qilinayotgan videoroliklarda haqoratlovchi yoki shaxsning sha’niga teguvchi so‘zlar bo‘lmasligi hamda ushbu materiallar salbiy taassurotga ega bo‘lmasligi lozim.

20. Tashkiliy qo‘mitaning ijtimoiy tarmoqlardagi sahifalariga a’zo bo‘lmagan ishtirokchilar nomzodi ko‘rib chiqish uchun qabul qilinmaydi.

21. Tanlovda 18 yoshdan 30 gacha bo‘lgan fuqarolar va O‘zbekistonda doimiy yashovchi fuqaroligi bo‘lmagan shaxslar ishtirok etishlari mumkin. 

22. Tanlov ishtirokchisi faqat bitta mahsuloti (videorolik) bilan bitta ijtimoiy tarmoqda va Vazirlik tomonidan eʼlon qilinayotgan tanlovlardan faqat bittasida ishtirok etishi mumkin.

23. Tanlovda bir yoki bir nechta (ijodiy guruh) muallif ishtirok etishi mumkin.

24. Videoroliklarda quyidagilardan foydalanishga yo‘l qo‘yilmaydi:

24.1. Millatlararo janjallarni qo‘zg‘atuvchi mazmunidagi millatchilik va ekstremistik chaqiriqlar, giyohvand moddalarni tarqatishga, davlatga qarshi va konstitutsiyaga qarshi mazmundagi taqiqlangan bayonotlar va shu kabi bayonotlarga xizmat qiluvchi lavhalar; 

24.2. Shahvoniy hirs uyg‘otuvchi sahnalar va (yoki) zo‘ravonlik, buzg‘unchilik sahnalari, shuningdek odamlar va hayvonlarning jismoniy azoblanishini aks ettiruvchi sahnalari bo‘lgan lavhalar;

24.3. Qo‘rqinchli, stressli hissiyotlar va hayajonlarni ko‘rsatuvchi matnlar, sahnalar, ovoz effektlari.



25. Ishtirokchi taqdim etilgan ma’lumotlarning to‘g‘riligi va mualliflik huquqi to‘g‘risidagi qonunlarga muvofiqligi uchun javobgardir.

26. Tanlovda ishtirok etishni rad etish tanlov materiallarda noto‘g‘ri ma’lumotlar aniqlangan, shuningdek, tanlovni o‘tkazish to‘g‘risidagi Nizomga zid bo‘lgan taqdirda mumkin.

27. Tanlov tashkilotchilari o‘z veb-saytlarida ishtirokchilarning materiallardan foydalanish huquqini o‘zida saqlab qoladi.


6-bob. Tanlov yakunlarini e’lon qilish

28. Tanlov ishtirokchilari tomonidan yuklangan videoroliklarni monitoring qilish Markaz tomonidan amalga oshiriladi.

29. Tanlov natijalari, Hay’at raisi tomonidan imzolangan protokol bilan tasdiqlanadi va Vazirlik hamda Markaz veb-saytlari va boshqa manbalar orqali jamoatchilikka yetkaziladi.

30. Tanlovning har bir ijtimoiy tarmoq bo‘yicha (Facebook, Instagram, TikTok) 1 nafar g‘oliblari, bunda umumiy 3 ta g‘olib bo‘lib, ularga tashkilotchilar tomonidan g‘oliblik sertifikati va notebook (i5/15.6 FHG/8GB DDR4 3200/SSD 256GB litsenziyalangan windows 10) topshiriladi.

31. G‘oliblarni taqdirlash marosimi 2022-yil 30-noyabr – 2 dekabr sanalarida bo‘lib o‘tadigan Toshkent xalqaro turistik yarmarkasi doirasida bo‘lib o‘tadi.


7-bob. Tanlovni moliyalashtirish

32. Tanlovni tashkil etish va o‘tkazish Vazirlik huzuridagi byudjetdan tashqari Turizmni qo‘llab-quvvatlash jamg‘armasi hisobidan hamda tanlovda g‘olib va sovrindor ishtirokchilarga Yoshlar ishlari agentligi va boshqa qonun bilan taqiqlanmagan manbalar hisobidan qimmatbaho sovg‘alar topshiriladi.

33. Tanlov g‘oliblarini qo‘shimcha taqdirlash uchun, homiylar mablag‘lari ham jalb etilishi mumkin. 

34. Tanlovni yuqori saviyada o‘tkazish, ommaviyligini oshirish maqsadida boshqa davlat va nodavlat notijorat tashkilotlari ham tanlov tashkilotchilari va homiylari bo‘lishlari mumkin. 


8-bob. Intellektual mulk huquqlari

35. Tanlovda ishtirok etish orqali ishtirokchi quyidagilarni kafolatlaydi:

- Tanlovga taqdim etgan materiallarning qonuniy egasi hisoblanadi (plagiat  ishlatmagan) va ularga nisbatan mutlaq huquqqa ega;

- Tashkilotchiga uchinchi shaxslar tomonidan ma’lumotlardan foydalanish bo‘yicha da’volar kelib tushgan taqdirda, u ushbu da’volarni qo‘ygan shaxslar bilan barcha nizolarni mustaqil ravishda va o‘z hisobidan hal qilish majburiyatini oladi;



- agar uchinchi shaxslar sudda yoki boshqa tarzda Tashkilotchining ma’lumotlardan foydalanish huquqiga e’tiroz bildirsa, ishtirokchi Tashkilotchi tomonidan ish yuritishda ishtirok etishi va Tashkilotchi tomonidan ma’lumotlardan foydalanishning qonuniyligini isbotlashi shart;

- agar ishtirokchi ma’lumotlardan foydalanish va tasarruf etishning qonuniyligini isbotlay olmasa va Tashkilotchi javobgar bo‘lsa, ishtirokchi sud qarori qonuniy kuchga kirgan kundan boshlab 10 (o‘n) kalendar kun ichida Tashkilotchining sud va/yoki nizoni ko‘rib chiquvchi boshqa organ xarajatlari, Tashkilotchidan uchinchi shaxs foydasiga undiriladigan summa, sud jarayoni bilan bog‘liq boshqa xarajatlarni qoplashi shart. 

- Tashkilotchiga mualliflik huquqi va/yoki turdosh huquqlar egalaridan, ularning vakolatli vakillaridan yoki uchinchi shaxslardan Tashkilotchi tomonidan ma’lumotlardan foydalanish bo‘yicha da’volar kelib tushgan taqdirda, ishtirokchi uchinchi shaxslar bilan tegishli da'volar bo‘yicha barcha nizolarni o‘z hisobidan hal etish majburiyatini oladi. 

- ishtirokchi Tanlovda qatnashish orqali Tashkilotchiga tanlovga yuborilgan materiallarni ko‘paytirish, ulardan nusxa olish, nashr etish, namoyish qilish (ommaviy) hamda har qanday vositalar yordamida, shu jumladan, efir va kabel televideniyesi orqali, Internetda, shuningdek, Tanlov bo‘yicha taqdim etilgan materiallarni ijtimoiy tarmoqlarda joylashtirish (nashr) qilish huquqini beradi. Qonun hujjatlarida taqiqlanmagan har qanday usulda tanlov materiallardan foydalanish mumkin, jumladan:

Tanlov davomida va maxsus onlayn kanallarda namoyish qilish;

Tanlov tashkilotchilarining axborot-tashviqot materiallaridagi nashrlari;

bosma va elektron ommaviy axborot vositalaridagi nashrlar;

Tanlovda ishtirok etish uchun taqdim etilgan ma’lumotlarni uning arxivida (elektron yoki boshqa formatda) Tanlov o‘tkazilgan kundan boshlab besh yil davomida saqlash;

Tanlov tashkilotchilarining veb-saytlarida ma’lumotlarni joylashtirish (ommaga yetkazish);

fotoalbomlar, ma’lumotli bukletlar, raqamli tashuvchilar va boshqa mahsulotlar, shu jumladan suvenirlar uchun ma’lumotlardan foydalanish.


9-bob. Yakunlovchi qoidalar


36. Tanlovni o‘tkazish tartibiga o‘zgartirish va qo‘shimchalar kiritish Tanlov tashkilotchisi tomonidan amalga oshiriladi. O‘zgartirish va qo‘shimchalar kiritiladigan taqdirda, bu haqda OAVda e’lon qilinadi.

37. Mazkur Nizom talablari buzilishida aybdor bo‘lgan shaxslar qonunchilik hujjatlariga muvofiq javobgar bo‘ladi.




Shu mavzuga oid yangiliklar